Главная » 2023 » Февраль » 22 » Yana bir davlatda 8,5 magnitudali zilzila bo‘lishi kutilmoqda – olimlar

---

13:54 Yana bir davlatda 8,5 magnitudali zilzila bo‘lishi kutilmoqda – olimlar

Ikki grek olimi yaqinda Gretsiyada 8,5 magnitudali zilzila bo‘lishini bashorat qildi. Professorlar Konstantinos Sinolakis va Kostas Papazakos Turkiya va Suriyadagi qator zilzilalar holatlarini, Gretsiyadagi seysmik faollik tarixini baholab, shunday to‘xtamga kelgan. Bu haqda mahalliy “Ta Nea” nashri xabar berdi. Sinolakisning ta’kidlashicha, Gretsiyada kuchli zilzilalar har 600 yilda bir marta sodir bo‘ladi. “Kritdagi oxirgi kuchli zilzila 1403 yilda sodir bo‘lgan va mening hisob-kitoblarimga ko‘ra, bunday zilzilalar har 600-800 yilda takrorlanadi. Biz Rixter shkalasi bo‘yicha taxminan 8,5 balli zilzila bo‘lishi arafasida turibmiz”, deydi olim. Olimning so‘zlarini uning hamkasbi, Salonikidagi Aristotel universiteti seysmologiya professori Kostas Papazakos ham tasdiqladi. U, shuningdek, Gretsiyadagi zilzilalar davriyligini ta’kidladi, ammo bunga aniqlik kiritmadi. Keyingi falokatning aniq vaqtini oldindan aytib bo‘lmaydi. Ikkala olim ham ularning prognozlarini bashorat sifatida qabul qilmaslik kerak, degan fikrga keldi. To‘g‘rirog‘i, bu aholini yuzaga kelishi mumkin bo‘lgan muammolarga tayyorlashga vaqt topish uchun hukumat e’tibor berishi kerak bo‘lgan ogohlantirishdir. Eslatib o‘tamiz, 6 fevral kuni Turkiyada 7 balldan ortiq (mahalliy vaqt bilan soat 04:17 da – 7,7 ball va soat 13:24 da – 7,6 ball) bo‘lgan ikkita zilzila sodir bo‘ldi. Prezident Rajab Toyib Erdo‘g‘an Turkiyada tabiiy ofat qurbonlari munosabati bilan yetti kunlik milliy motam e’lon qildi. Turkiya davlat bayroqlari butun mamlakat bo‘ylab yarimga hilpiratildi.  Vayronkor zilzila qo‘shni mamlakatlarda, jumladan Suriya, Livan, Shimoliy Kipr Turk Respublikasi, Kipr Respublikasi va Iroqda ham sezildi. Manba: "qalampir.uz"

1 2 3 4 5 Категория: Dunyo xabarlari | | Теги: 5 magnitudali, zilzila, Bir, yana, olimlar, kutilmoqda, davlatda, bo‘lishi | Рейтинг: 0.0/0